நியூஸிலாந்து மற்றும் மேற்கிந்திய தீவுகள் அணிகளுக்கிடையிலான முதலாவது டெஸ்ட் போட்டியின், இரண்டாம்நாள் ஆட்டம் நிறைவுக்கு வந்துள்ளது.
இதன்படி இன்றைய ஆட்டநேர முடிவில், முதல் இன்னிங்ஸிற்காக துடுப்பெடுத்தாடிவரும் மேற்கிந்திய தீவுகள் அணி, விக்கெட் இழப்பின்றி 49 ஓட்டங்களை பெற்றுள்ளது.
நியூஸிலாந்து அணியின் முதல் இன்னிங்ஸ் ஓட்டங்களுடன் ஒப்பிடுகையில், மேற்கிந்திய தீவுகள் அணி 470 ஓட்டங்கள் பின்னிலையில் உள்ளது.
ஆட்டநேர முடிவில் ஜோன் கெம்பல் 22 ஓட்டங்களுடனும் கிரைஜ் பிரத்வெயிட் 20 ஒட்டங்களுடனும் ஆட்டமிழக்காது இறுதிவரை களத்தில் இருந்தனர்.
ஹெமில்டன்- சீடன் கார்டன் மைதானத்தில் நேற்று (வியாழக்கிழமை) ஆரம்பமான இப்போட்டியில், நாணய சுழற்சியில் வெற்றிபெற்ற மேற்கிந்திய தீவுகள் அணி, முதலில் களத்தடுப்பை தீர்மானித்தது.
இதன்படி களமிறங்கிய நியூஸிலாந்து அணி, முதல் இன்னிங்ஸிற்காக 7 விக்கெட்டுகள் இழப்புக்காக 519 ஓட்டங்களை பெற்றிருந்தபோது, தனது முதல் இன்னிங்ஸ் ஆட்டத்தை இடைநிறுத்திக்கொண்டது.
இதன்போது நியூஸிலாந்து அணி சார்பில், அதிகப்பட்ச ஓட்டங்களாக, அணித்தலைவர் கேன் வில்லியம்சன் 251 ஓட்டங்களையும் டொம் லதம் 86 ஓட்டங்களையும் கெய்ல் ஜேமிசன் ஆட்டமிழக்காது 51 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணியின் பந்துவீச்சில், கெமார் ரோச் மற்றும் செனோன் கெப்ரியல் ஆகியோர் தலா 3 விக்கெட்டுகளையும் அல்சார்ரி ஜோசப் 1 விக்கெட்டினையும் வீழ்த்தினர்.
இன்னமும் 10 விக்கெட்டுகள் வசமுள்ள நிலையில், போட்டியின் மூன்றாவது நாளை மேற்கிந்திய தீவுகள் அணி நாளை தொடரவுள்ளது
